vaima

Faarava’ianuu

Ua here au i te iòa  tä te nünaa no Vaiùriri  i hö mai ,

No te  Nuu hoì au e,

Tei rotopü hoì au i te  Nuu.

O vau te iho o te pape
O vau tei taohia o Tane

Tei roto vau i te Täpau o te mau Raàu

Tei roto vau  i te Ua e maìri nei  mä te faahotu i te Fenua

Tei  roto vau i te Vai o te mau Puna

Tei roto vau i te mau Roimata e haamaitai nei i te Ao nei

Tei roto vau i te Tatea e faahotu nei i te vahine

Tei roto vau i te Mamari o te mau ià e ueue nei i te huero

Tei  roto vau i te Vai e tämä nei i te mau Varua hou te revaraa ,

Ia rere ratou i te hoê Puna Nui aè`.

O vau te Puna o te mau rohi pehe

O vau te Puna varua e haamäha i te hiaài

O te mau taata atoà e poihä nei .

Tei roto vau i te pape o to outou tino

E riro ai outou paatoà ei taeaè, ei tuahine,

Te Vai Ora a Tane 

Te Ara Fetià,

Te Vaiü o te ora

E haamehara nei i tà ù Haa 

E tarava o ia i roto i te raì

I te tau o Matarii i raro

Ei tapaò faaiteraa ia outou e,

Ua matara te ùputa o te Ite,

E inu rä i te Vai o to ù Puna

Ia î outou i tà ù mau haapiiraa.

Ia riro to ù Puna ei Vai

 No te taatoàraa e poiha nei.

O vau te papa o te mau ôroà faahoturaa

No te tö papaa a te nünaa Initia

No te ufi a te nunaa Taratoni tumu

O Tane hoi au io outou na

O Pane hoi au io te mau Hereni

O Otiri hoi au io te mau Aifiti

O Tirina hoi au io te mau Hinitu

E huna hoi au i to ù iòa

Ia òre o ia

 Ia riro ei faaroo.

Mai te ômuaraa iho te mau vahine e here ai ia ù

 E haamanaò hoi au i te iporaa e te  hoturaa .

Tei roto vau i te Vai e rapaàu

Tei roto vau i te Vai e tamä

Tei roto vau i te Vai e haamoà .

E rohi pehe hoì au.

No reira vau e parauhia ai e Puhi Tarià

No to ù faaroo.

I mutaa iho ra ,

 Ua faatano vau i te taatoàraa o te mau Vai o Tahiti .

  Te pape tatai tahi i to na  iho  taìraa,

Te taàtoàraa mä te himene au .

Ua riro nä Puna vai rau o Tahiti

Ei ùpaùpa faaòtoraa i ta ù mau taìraa tataì tahi,

Ei pü ôpereraa i ta ù mau faufaa tataì tahi

                                             Te taàtoàraa o te nünaa o Tahiti

Tei faatura i te pape e to na mau taìraa.

Te faatanotanora o te reira

 Tei riro mai ei Pehe

O ta ù i faaòto na ,

 O ta ù i faataì na mä te Au.

Ua tuàtiàti te nünaa

 I te reira mau taìraa pape.

   A hiti o Ra ,

A hiti o Hina

Te hopuhopu noa raa  te nünaa i te au o terä Pehe

 O Vavau to ù Ao
I reira to ù tanuraa i te Faufaa ora o te Faahoturaa

I faahuru ê hia e te taata

No  te haruraa fenua .

Tei roto vau i te Nuu

Tei rotopu vau i te Nuu

No te Nuu Vau

E Vai ai

O Tahiti Manahune, te ioa oTahiti i te tau i maìri

O Tahiti- i- te- nünaa - e - tomo- i- te- varua- o- te- mau- mea- atoà.

No roto mai te mau manahune i to outou nunaa

Vetahi o ratou tei tomo atu i roto i te varua o te pape,

 Ua riro ia ei  Vahine tetea

Vetahi tei tomo atu i roto i te varua o te moana,

 Ua riro ia ei Meherio.

Tei roto vau i te mau pape atoà

Te vai o te haari ta ù faturaa teitei roa aè i roto i te aru

 No te haamäharaa i te poiha o te Nuu

E aà te àva i ânoìhia i ta ù pape

Ia püpühia te àva i te fenua, e faahotu o ia i te fenua no te faaài i te Nuu

Ia püpühia te àva i te Moana, e faahotu o ia i te tai.

Ia inu te taata i te àva, e faahotu o ia i te  tino e te varua o te taata.

Te àva , e inu i faataahia  na te Nuu

O ta na e nehenehe  e rave ma te taù i to ù Faufaa Ora

Te Pua te tiare o te rua maoro , tapaò  no te àuhune .

                                   Ua riro te rauraa o to na mau û ei ata

O te puraraa o te Rä

Te Hinano, te pua o Hina- te - marama

Mai te hoturaa o te  âvaè ra

Te tau o to na ùaàraa.

Vahine Heipua
Vai Hinano